網購最開心嗰刻就係收到件貨拆件嘅時候，但係啲賣家有時太認真，拎泡泡紙包到件貨成嚿木乃伊咁，真係好似等你「一層一層剥開我的心」咁呀！淨低咗一大堆泡泡紙喺度，唔通真係自己一個啪啪啪晒佢咩。

件件貨都用咁多膠，又點向我哋嘅地球先生交代呢？今時今日咁嘅防撞方式係唔夠㗎！呢個日本賣家就唔同呢，佢見呢個客仔買咗成1KG 彩石朱古力，就知道呢包嘢對買家嘅童年嚟講係幾重要，為咗確保呢包那些年嘅回憶安全送到客人手上，賣家就用咗特別嘅防撞物料喇～

冇錯，就係大大包嘅爆谷啦！呢包爆谷唔止同填充氣袋有異曲同工之妙，有返咁上下空氣做緩衝，入面嘅爆谷仲有效吸收衝擊，保護石仔朱古力嘅安全，最重要係用完都仲食得呀嘛！咁都畀個賣家諗到，真係突破晒集運界嘅盲腸呀！

所以話～網購都可以好環保㗎～如果唔想用爆谷，下次試下棉花糖都唔錯㗎～不過寄畀男仔就記得好似賣家咁特登寫張卡仔，話佢聽呢包係防撞物料，可以放心食用，唔係一陣畀人誤會你做咩送包White Sun Gun畀佢就唔好啦～

封面圖片及資料來源：TenDieci／twitter

延伸閱讀：【係小心嘅】用咁多填充氣袋就係為咗保護咁細件貨？