2017年04月10日 星期一
【融化了】阿女偷偷地塞隻公仔入爸爸公事包陪佢去公幹
每個人都實有啲嘢當係心肝寶貝嘅，唔係講緊公公冇咗嗰啲呀，係講緊你覺得最珍貴啲嘢呀！可能有啲人嘅寶貝係第一次出糧買嘅錶、有啲人嘅寶貝係初戀對象寫嘅生日卡，而小朋友嘅寶貝，九成都係玩具喇。叫得做寶貝，梗係要跟身，仲畀人掂下都唔捨得㗎啦！
最近，呢個爸爸就話自己一打開個公事包，竟然見到阿女隻寶貝小飛象喺入面啵！死喇，唔通佢手快快拎走咗？咁今次咪搞到阿女喊到成個豬頭咁？
其實係咁嘅，阿女知爸爸要自己一個人去外地公幹，驚佢空虛寂寞凍，所以咪偷偷地塞隻小飛象入公事包度，代替自己陪爸爸囉！阿女仲寫咗張字條同爸爸講自己有幾愛佢，真係成個心都融化晒喇……一直以為小飛象係阿女嘅寶貝，但佢連自己最鍾意嘅公仔都肯借畀爸爸帶走，原來爸爸先係乖女嘅終極寶貝呀！
爸爸要去第二度出差，阿女就借公仔畀佢解悶吖，原來調返轉，阿女去咗O Camp，爸爸都一樣會好掛心㗎！台灣呢個廿四孝爸爸見阿女成個禮拜都冇返屋企，所以就晚晚都入阿女間房睇下佢返咗未，仲好似簽到咁，寫紙仔話自己有幾掛住阿女呀！阿女都讀大學啦，仲咁黐身，唔怪得人哋話阿女係老竇嘅前世情人啦！
Joys of Parenting - Found in Suitcase on a Business Trip from pics
封面圖片、資料來源連結：endustry1994／reddit、dcard
【滿滿的父愛系列】
