呢排多得阿姐唱隻「經過那些年～～」唱到街知巷聞，又適逢夏日熱辣辣就嚟放暑假，搞到毛孩都諗返起細個（雖然而家都唔算好大個啫）淨係食、玩、瞓同扮讀書嘅歲月。而其中最令人難忘嘅，就當然係細個玩到爛嘅玩具啦！如果你咁啱係90後左右，而童年又冇畀阿媽捉去學乜學物所以有時間玩玩具嘅話，可能你都有沉迷過以下嘅玩具㗎！！

10. BB彈槍

呢支槍細個成日偷偷地拎返學玩（如果捉到係要記過的），有啲調皮啲嘅同學仔仲會用佢嚟射落啲無辜嘅女同學度，而家諗返起，佢哋根本就係用支槍去發洩自己嘅獸性！真係可惡呀！物化女性可恥！！

9. 奇多圈

要有奇多圈，就一定要買包粟米條先（斷估你細個唔識上網Bid啩？），如果你贏咗就可以拎輸家嘅奇多圈做獎品，如果輸嘅話......咪問厚住面皮問阿媽攞錢買囉！如果毛孩我細個唔玩呢個遊戲嘅話，分分鐘而家可以買得起層樓㖭！

8. 他媽哥池

呢隻嘢即係等於電子寵物，用嚟畀啲得三分鐘熱度嘅小朋友試下養一隻寵物嘅滋味。聽講有啲好有愛心嘅小朋友，仲會對住部機對出真感情，直頭同佢傾偈㖭呀（利申：唔係我）！

7. 四驅車

呢款玩具根本就係贏在起跑線嘅玩具！只要你有錢，啲零件咪靚，咪贏到人、咪跑得快過其他人囉！細個玩開呢款玩具嘅小朋友，而家咪玩真車囉，好出奇呀？！

6. BB戰士

呢個Q版高達，憑住一個硬梆梆嘅外型，加上冷冰冰嘅面孔，再加埋得意又可愛嘅身形，成功瘋魔當時嘅萬千少男。呢個故事教訓我哋啲乜？咪就係好多男人都只係外表冷酷，內心其實咪又係鐘意埋啲得得意意嘅嘢囉！

5. 搖搖 

搖搖呢家嘢，只要你一攞咗上手，就會慢慢變成神經反射咁，無論食飯、讀書、做功課、睇電視......等等，都係會漫無目的咁起勢咁玩佢，一放一收、一放一收、一放一收，實在係培養港產娘娘嘅必備佳品。

4. 彈珠人

同BB槍一樣，呢種玩具嘅主要作用都係——射，分別只係在於BB槍嘅BB彈好細粒，但彈珠人唔同，佢嘅彈珠就實實淨淨、擲地有聲。最好就係等粒彈珠碌落地，然後就可以跣9啲同學仔，實在係小朋友面對社會前一定要識嘅其中一項技能！

3. 爆旋陀螺

「我要與你硬踫以爆裂嘅高速旋動」，你細個以為兩個嘢硬踫，好似真係幾過癮，大個之後，當你腦細每日臨走前先叫你做啲咩咩嘢嘅時候，你先知，公司冇人同你硬踫咁過癮，留低你一個，自己旋動至筋疲力竭吧！

2. 數碼暴龍機

當年數碼暴龍機百幾蚊就有一部，今時今日嘅15週年版就要成700幾蚊部，原來連玩具都要跟返通脹呀陰功！啲人成日話「回憶是無價的」，根本就假嘅，回憶根本就係跟通脹咁升值，但我啲人工就永遠都係同一個水平囉！

1. 遊戲王卡

《遊戲王》青眼白龍係最經典嘅遊戲卡款之一，高峰期曾經升到去60蚊一張。想當初恆指急挫下滑仍然絲毫無損佢嘅價位，就睇得出佢嘅穩定性，絕對係90年代閃卡炒家嘅佳品。至於有咩實際作用呢……不如我問返你吖，股票有咩實際作用？