2016年01月19日 星期二
【隱世高手】用鐵刷都畫到幅牆咁靚？
正所謂，高手在民間！呢位台灣神人就體現咗呢句說話嘞，一對Magic Hand，加埋啲簡單嘅工具，竟然可以喺幅牆度畫畫，仲要靚到勁多網民Like爆？！
唓！有幾叻啫，毛毛夠識畫......火柴人啦～不過原來呢個自稱「黃聖人」嘅隱世藝術家畀人話係高手嘅原因係：佢畫畫唔係用畫筆同顏料，而係只需要用一個鐵刷呀！
佢嘅作品仲會喺台灣唔同地方見到，而一班網民啪啪啪啪啪聲讚好之外，仲封咗佢做「鳳山唐伯虎」?～
可能你哋會突破盲腸咁心諗：「咪住先！佢咁樣樣周圍亂畫係破壞公物㗎喎！」，但如果你哋真係咁諗就錯喇，因為佢其實只係慢慢刷走牆嘅污糟嘢，直至刷到變成一幅畫㗎咋！
其實藝術嘅嘢，毛毛都識少少嘅，不過喺香港都係唔畫好啲～唉！你哋知啦，喺牆畫嘢分分鐘會畀慈母拉㗎嘛......
資料及封面圖片來源：Max Liu/爆料公社
