為咗自己鍾意嘅嘢，你可以去到幾盡？香港有班小學生就因為鍾意玩陀螺，竟然自發寫計劃書，同校長爭取成立陀螺學會呀！

呢位網友話，本身間學校係冇陀螺學會嘅，但係呢班小朋友又好想喺學校玩，於是咪走去同校長提議囉！校長就叫佢哋寫份計劃書出嚟睇下先，估唔到佢哋又真係做到，仲做得好詳細?喎！

時間、日期、地點同埋活動詳情呢啲基本嘢就唔再講啦，佢哋仲訂立埋規則，成員唔可以嗌交或者打交，唔係一味掛住玩㗎！諗諗下，仲同呢套卡通片嘅劇情一模一樣喎！又係成班小學生想喺學校玩陀螺最後一齊成立爆旋陀螺學會！喂邊個話卡通片教壞細路㗎下？

Between，唔好話佢哋夠膽同校長爭取嘅呢份勇氣好抵讚，淨係識寫計劃書呢樣嘢，就已經叻過毛毛喇！老老竇竇，毛毛除咗以前中學要考實用文之外就冇再試過寫計劃書喇……講起都真係有啲慚愧……睇嚟我哋呢啲所謂大人都係時候要同班小朋友學下嘢喇。

圖片來源、資料來源：梁童心／‎不願小朋友成為功課奴隸