對於電腦，而家嘅細路分分鐘仲熟過你，可以教返你轉頭。有返咁上下年紀嘅毛毛，小學接觸到電腦時，可以話係驚為天人。不過去到而家日日返工，對住部電腦19幾個鐘，電腦已經冇晒嗰種「可遠觀而不可褻玩」嘅感覺。

亂打字懶係快
明明唔識打倉頡同速成，但都要扮晒嘢狂打字，因為毛毛細細個就已經覺得打字嘅啪啪聲好好聽。而且，上電腦堂時，仲可以同班朋友嚟返場冇內容嘅比賽，望住成個mon都亂晒碼，會有一絲絲嘅成就感。

搜尋自己個名

當老師教大家上網，第一時間就梗係搵自己個名，睇下自己有冇同人撞名，同埋有冇FD子搵過自己。

呢個習慣，毛毛到而家都仲維持緊。不過，愈搵愈傷心，見到咁多年嚟都冇朋友提過毛毛個名咁濟，真係心都酸埋...

玩內置嘅遊戲

有時上唔到網，玩接龍、彈珠台同踩地雷都可以玩足一日，邊似而家，冇得上網就好像世界未日咁。對於有呀哥家姐嘅，電腦就得一部，咪得個「睇」字囉！

小畫家大師

舊版小畫家嘅功能有幾多，大家都心知肚明，毛毛最鍾意就係用個噴槍，畫煙花啦、畫雪啦，既方便又快捷。

誤上px.com

身為血氣方剛嘅小學雞，都會曾經無意、不小心上過px.com，因為啱啱開始上網，而且又學識講下粗口，所以就...

以毛毛經驗嚟講，第一次通常都會嚇到即刻熄咗，仲會望下身邊有冇人見到、好驚中毒，但慢慢就會不能自拔。

電腦用途有好多種，以前唔使用腦、亂用電腦已經成為歷史，而家放假甚至連電腦都懶得開嚕！