毛毛相信，做公主係每一個女人心入面嘅夢想，如果唔係點會一街都係公主病嘅女仔吖……都明嘅，卡通片入面嘅公主全部都又靚又有得住城堡，會FF自己係公主一份子，其實都係一件好合理嘅事嚟！就好似呢個日本妹妹一樣！

呢個只係得2歲嘅妹妹，自從睇完灰姑娘卡通片之後，就開始FF自己其實就係灰姑娘本尊。要做一個完全體嘅灰姑娘要點呀？梗係唔少得一對玻璃鞋啦！於是佢千辛萬苦，終於搵到喇！

冇錯，佢對玻璃鞋就係…佢老竇部wii嘅手掣膠套囉！透明又fit size，唔使斬腳指都著得落，又難怪呢個妹妹會著住佢通屋走嘅！有網民見到都開心些牙，話佢細妹舊年都試過著住個手掣膠套當係玻璃鞋，睇嚟呢個係妹豬界嘅新潮流呀下！

雖然咁樣樣做真係好pure好true，但係毛毛希望，佢哋想做公主嘅呢個夢想，去到大個唔會變成公主病啦，55。

圖片來源、資料來源：shinobineeenaaa／twitter