喺童話故事入面啲屋，間間唔係城堡就獨立屋，又靚又有特色。喺而家充滿土地問題嘅香港，不禁唱句童話裡都是騙人的⋯⋯外國就唔同呢，起十幾間豪宅都濕濕碎呀！不過，全部都係雀仔限定。

呢啲咁靚嘅雀仔豪宅，全部出自一個人嘅神之手，就係阿Jay，即係Little Lodging嘅創辦人喇。佢平日都好鍾意整吓傢俬畫呀畫咁，但整咁多雀仔屋都係為咗佢阿媽。想當年阿媽60大壽，佢又諗唔到送咩喎，忽然醒起阿媽好鍾意喺花園撚雀，於是就燃起咗佢嘅工匠之魂喇！

你睇吓，佢間間屋都有唔同嘅風格同主題，但係每一間都係咁Fantasy，咁夢幻㗎。好似呢間咁，一睇就知佢係愛麗絲夢遊仙境主題啦，唔知敲吓門會唔會有個縮水愛麗絲走出嚟呢？

仲有啲網友話，佢啲屋好有某個導演嘅style，唔知大家係咪同毛毛一樣咁醒諗到邊個呢？嗰個呢～成日同Johnny Deeper 合作嗰個呀！Tim Button呀嘛，毛毛梗係識啦～

整得咁靚，梗係唔係送晒畀阿媽啦傻豬，呢啲屋仔大概賣港幣400-600蚊，仲可以自己揀要邊一款門，如果你有啲咩idearrrr，自己同阿Jay傾都冇問題，等佢為你打造真真正正嘅Dream House！

見到呢啲屋仔咁靚，你係咪都好想問叮噹借返個縮細電筒入去住呢？真係做雀好過做人呀～唉，明明毛毛都係一隻冇雀嘅腳仔，點解冇人幫毛毛起返間咁靚嘅屋㗎！公平咩？算啦，無咩事，我都係落公園啦⋯⋯

封面圖片、資料來源：Boredpanda