記唔記得上次個東和馬傳人呀？整綠龜包嗰個呢～唔知係咪食得麵包多想轉吓口味，所以改咗去整便當呀，作為一個動漫迷又點會整普通日式便當咁簡單呢？識整梗係整《食戟之靈》幸平嗰個海苔便當啦！

呢個便當有咁多層，一睇就知道步驟有幾繁複啦～由於時間嘅關係，睇下完成品先！每一樣都跟足動畫做法，連條獅子狗都係自己打魚肉整成㗎。唔信？有圖有真相！

樓主對食真係有份堅持㗎，就算冇炭爐都堅持要用焗爐慢慢焗，堅持自己焗完先再拎去炸，唔係超市買條現成嘅嚟炸。連影相角度都跟足動畫，絕對唔係圖片只供參考㗎～

最Amazing都係嗰啲分子海苔，呢啲一粒粒好似魚子咁嘅嘢究竟點整出嚟㗎呢？嗱，呢個實驗，最緊要就係記性，唔係就會好危險㗎啦。簡單嚟講就係將啲嘢煲完撈埋一齊，再拎細個做lab嗰種滴管逐滴滴落清水，完。詳細自己睇食譜啦～

雖然今次個便當賣相好似冇咁精緻，但都應該好食嘅，應該係。呢款唔啱食都唔緊要，因為佢仲還原咗其他食戟裡面嘅菜式，好似呢嚿仿製脆五花肉咁，係咪睇到都濕晒呢⋯⋯個口。

不過相信大家都比較想睇食完個反應多過食譜，冇錯！忠於原著最緊要呀嘛，55。

封面圖片及資料來源：dcard

回帶：【童年回憶】日式麵包王啲麵包 真係整得出㗎！