【你呃人】呢個《美女與野獸》公仔明明就係Justin Bieber!

雖然由細到大已經睇過千幾次《美女與野獸》,個故仔幾乎由尾背返上嚟都識,講個靚女睇中咗個有錢皇子,於是就幾辛苦都幫佢破除魔咒吖嘛……但係聽到3月上畫嘅真人版電影由真女神Emma Watson飾演女主角,又好有興趣入場細心欣賞啵!

圖片來源: Disney

圖片來源:CGBPosts/twitter

套戲就仲要等多幾個月先有得睇吖,但係商家佬就已經推出咗真人版公仔喇。把啡色秀髮同條華麗嘅長裙又做得幾似啵,仔細睇下,個樣樣仲好似真人𠻹!

圖片來源:Superpizzacorn /twitter

不過個真人就唔係Emma,而係……Justin Bieber咁解啫。再睇真啲,個公仔塊面仲整埋一粒粒雀斑仔,手功都幾仔細㗎。都叫側田B爸搽多層防曬先出街㗎啦,你睇下,出事喇。

圖片來源:Kansas City Star

做咩啫你哋,人哋話係《美女與野獸》真人版公仔咋嘛,都冇話一定要照住Emma個樣嚟整!好心你哋思想開放啲啦,男仔都一樣可以留長頭髮同著裙㗎啫!Btw,咁搞法,會唔會變咗《野獸與野獸》㗎?

 

 

封面圖片、資料來源連結:CGBPosts/twitter

 

毛記電視網站 · 版權所有 · 不得轉載 Copyright © TVMOST.COM.HK All rights reserved