廢青成日話覺得自己係零，唔好以為佢哋好灰機呀，其實話唔定佢哋係第二個意思！仲記唔記得小學數學阿Sir話過零又即係無限先（好似有講過）？不過毛都未出齊嘅小學雞又點會明咩係無限呀，阿Sir就解釋：無限即係好似宇宙，或者Excel咁……但其實，Excel笨唔係無限，而係有最底一行㗎！

最近外國有個都幾大隻（這是重點）嘅靚仔（這也是重點）做咗個單手大挑戰，就係開住個Excel，再一直撳住向下箭咀完全唔放手，睇下到底Excel嘅可以去到幾盡。

撳咗成兩個鐘，大隻仔都開始悶喇，於是就明張目膽咁喺枱底拎咗一大抽……鎖匙出嚟9揈揈，仲唔小心打到自己塊面?。

再撳多兩粒鐘，佢呢個單手高手又心思思，見反正都係單手，不如打下……棒球喇。不過因為要撳實粒箭咀，冇得真係打波，唯有齋玩枝大棒棒啦。

玩得耐都見肚仔餓喇，咪食返個包囉，不過都一樣係單手食嘅。

再玩下波仔瞓下覺仔，九個鐘頭咁咪過咗囉，所以話，只要唔喺公司，時候真係好易過嘅。

單手撳咗足足九個半鐘頭，佢盡於去到Excel嘅盡頭喇，原來最底一行唔係99999，而係1048576呀！有醒目仔網民就話，其實只要撳住ctrl同向下箭咀，就可以輕輕鬆鬆一嘢飛到落去……哼，單手大挑戰嘅浪漫你識咩呀！毛毛覺得大隻仔最勁唔係發現咗Excel可以去到幾盡，而係證明人原來可以九個幾鐘唔去廁所呀！

封面圖片、資料來源連結：Hunter Hobbs／YouTube