2017年01月13日 星期五
【完全fail】諗住測試下主子鍾意食邊隻糧 點知佢全部清晒
主子嘅心意，真係唔係一個普通奴才可以理解。
最近，有位來自韓國嘅奴才就因為唔知買咩口味嘅乾糧先啱主子胃口呢個問題煩咗好耐，最後佢終於諗到一個解決方法，呢個方法就係……一次過買晒十幾款唔同口味嘅乾糧返嚟，跟住將啲乾糧放晒喺張紙度，然後再睇下主子會揀邊款乾糧嚟食咪得囉！
點呀，呢個方法係咪好醒呢？大家睇下，主子佢食喇！佢開始食喇！
愚蠢嘅人類，乜你真係以為咁樣樣就可以知道主子嘅心意喇咩？呢位奴才原本諗住呢個方法一定掂過碌蔗啦，點知呢隻主子竟然將咁多款乾糧一粒不漏咁食晒落肚……嗚嗚！主子隻隻糧都食晒落肚，咁主子即係最鍾意食邊款呀？咁呢位奴才以後又應該入邊隻貨好呀？
唉，唔通你咁都唔明白咩？主子想表達嘅意思咪就係佢多多都食得落，最好你個奴才就有咁多畀咁多佢食囉！明未呀蠢材？（當然，奴才都唔可以畀主子過肥啦，如果唔係會影響健康㗎嘛！）
雖然今次呢個實驗就測試唔到主子最鍾意食邊款乾糧，之但係，呢個實驗都證實到原來你班奴才真係咁蠢，55。
미친ㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋㅋ
— 언니물지마요 (@weS2mayo) 2017年1月4日
기호성 검사 결과 : 돼지 pic.twitter.com/04BbNbsPUA
資料來源：weS2mayo／twitter
