千八蚊可以做到啲咩？唱通K唱到喉嚨爛啦／食幾餐放題啦／買到部相機啦／兩對波鞋啦／甚至夠去日本平玩三日啦（搶到平機票嘅話），而家多一個選擇喇，就係買到把紙扇呀！

咩話？一把紙扇要成千八蚊，有冇搞錯呀？各位觀眾，我冇講錯你冇聽錯，真係千八蚊呀，講緊嘅之唔係GUCCI新出嘅呢把日本紙扇囉，賣緊26000円，即係1800蚊港紙。木柄上面刻住GUCCI個logo，撥出嚟嘅風唔知係咪會特別涼㗎呢？

隻手揸實個木柄，咁人哋咪睇唔到個logo，唔會話「嘩你把扇係GUCCI㗎好high class呀」咁囉？咁買嚟仲有咩意義呀？唔使擔心，扇上面大大隻嘅日文字其實係GUCCI日本拼音，你個虛榮心有幾大個窿佢都包保滿足到！

除咗雞乸咁大隻字款之外，仲有意味不明嘅貓頭鷹款同復古花花款，愈大力撥，出嚟出嚟嘅風就會愈涼，是咪好神奇好抵買呢！吖咁多款，唔知邊把易襯衫啲呢？
……揀咩啫，講到自己好似真係有錢買咁，吹返你嘅硬膠芭蕉扇啦廢青。

グッチのうちわダッセェ〜〜〜ほしい〜〜〜¥26,000〜〜〜 pic.twitter.com/ASPwG0JHxU

— そばがき (@buckwheatpalace) February 23, 2017

封面圖片、資料來源連結：buckwheatpalace／twitter、GUCCI