我哋成日嫌香港地方細，其實樂觀啲諗，都有好處嘅，就好似大學住hall咁吖，遠極咪天水園返港大，都係一兩個鐘頭車程嘅事啫，人哋美國大就係大呀，不過分分鐘要去到第二個洲讀大學，阿媽想畀少少嘢個仔都要寄包裹先得呀！

美國有個喺賓唔知咩州讀緊大學嘅後生仔Connor Cox早排就收到佢阿媽寄嘅包裹喇，唔知係咪阿媽驚佢唔夠暖，寄張毯仔畀佢呢～定係驚阿仔成日喺出面食埋晒啲快餐，所以寄箱阿公親手種嘅水果畀佢呀？真係諗下都覺得sweet呀～

一打開個箱，下？用過嘅紙巾、吉嘅可樂罐同成堆垃圾？摷勻成個箱都冇樣嘢可取喎，阿媽，話晒我都係你個仔吖，點解要咁對我先……

阿仔收到咁大箱意外驚喜，梗係即刻打返屋企問下咩事啦，點知阿媽好冷靜咁話：「嗰啲全部都係你本身應該掉出門口嘅垃圾」。

哼，阿仔你咁冇手尾，話掉垃圾又擺喺屋企，係咪奉旨要阿媽同你跟手尾先！出得去讀書即係大個仔，要學下點獨立啦，連掉垃圾咁小事都唔記得做，點做男子漢呀！

好彩阿仔你喺屋企嗰陣冇留低啲充滿蛋白質嘅紙巾咋，如果唔係可能入箱嗰陣就係紙巾，出箱嗰陣就係菇菇㗎喇……Btw，阿媽可能都係想呃你打個電話畀佢傾幾句啫，用心良苦呀！

Thought my mom was sending me a care package... but instead she sent me a box of trash i was supposed to take out. pic.twitter.com/UetdT5UoVP

— Connor Cox (@thedeal_5) January 30, 2017

封面圖片、資料來源連結： thedeal_5／twitter