喺普通人一廂情願嘅諗法入面，超人通常都係睇得又打得，但係日本就有個超人睇得之餘仲食得?！講緊嘅咪係成日搣自己個頭畀人食嘅麵包超人囉，大家塊面都係圓碌碌眼大大，Thomas火車好心你就學下人哋麵包超人喇，化下妝，面色好啲咪唔會成日嚇親人囉！咁受大人細路歡迎嘅麵包超人雖然識飛，但間中都會貼下地坐下車仔㗎～

咁麵包超人嘅座駕梗係要有埋佢個嘜頭先夠代表性㗎啦～不過呢架麵包車，通常都淨係見到模型車仔嘅size，要有機會去到麵包超人博物館，先見到真人入到嘅大細咋，但係都係睇得唔郁得，爭咁啲喎。唔緊要～有網友就用電腦設計將呢架車變成現實喇！

首先，梗係要起咗個稿先啦，個比例同埋顏色都同原型一模一樣呀！如果揸住呢架車出去，一定吸引到大把女想過嚟影相呃like啫～唔好諗咁多，係同架車影，唔係同你影呀。

由於時間嘅關係，就直接睇下個成品喇，但係新車落地唔出去走返轉試下車又點得㗎～麵包超人平日就好低調嘅，咁試車梗係揀夜媽媽冇咩人嘅時候啦～咁先可以放心頭搖又尾擺㗎嘛～

點知呢位正義嘅朋友開車冇耐竟然畀警察截住咗呀！喂，有開車頭燈，又醉酒駕駛，話晒麵包超人都係行俠仗義想幫下人啫，麵包冇得申請身分證考唔到車牌佢都唔想㗎，講改裝嘅話蝙蝠俠架車仲離譜啦～你咁分明係迫害正義朋友啫！

大家放心，麵包超人咁善良咁乖豬又點會犯法吖，其實呢一輯相係網友用CG 合成出嚟㗎啫，仲成功喺Twitter呃到唔少人令大家瘋傳?～btw，如果要整部堅麵包超人車，不如直接用大型連鎖店啲麵包整喇，反正入面都係空心㗎啫～

封面圖片及資料來源：kilin_rc／twitter、背包客棧