2017年03月03日 星期五
【係成功嘅！】日本網友自製收件箱擺門口 叫速遞員自行組裝
而家上網shopping咁方便，只係撳幾個掣，連銀包都唔使拎出嚟就買到心頭好，一下忍唔到手，就好容易買到一屋都係㗎。成個網上購物過程嚟講，最麻煩應該都係收貨呢一part喇，寄去公司固之然爽啦有得即刻偷偷地開箱，但係撞正星期六日放假咪要等多兩日？寄去便利店都唔錯嘅，不過只限細件貨品吖嘛。買得又多又重，最好都係直接用宅配，不過又要煩邊個得閒喺屋企簽收囉……
哼，幾大嘅難題都唔會阻止到世人上網shopping嘅決心㗎！日本有個網民就自製咗個宅配收件箱喇，唔好以為呢塊只係普通膠板呀，其實打開就可以變做個大膠箱㗎喇，仲要連鎖都有埋?！
問准咗包租婆之後，佢就將個宅配收件箱擺喺屋企門口，再將印章收起（當然會話畀速遞哥哥知擺咗邊啦），叫速遞哥哥自行組裝個大膠箱，將件貨擺入去再上鎖。交貨、收貨全程由速遞哥哥一人分演兩角！
你都知做速遞幾忙㗎啦，一日幾百萬件貨等住哥哥仔送，送到上嚟門口仲要自行組裝膠箱？人哋肯唔肯㗎？實驗証明，係成功嘅！真係辛苦晒你喇速遞哥哥！嚟嚟嚟，入屋飲杯咖啡先走啦，今晚飲嘢夜唔夜呀嘻嘻～
講返正經嘢先，雖然咁做真係幾方便，不過你個爛鬼膠箱都冇鎖死喺固定位置，人哋成個搬走咪得囉，有把鎖仔又有咩用喎！
宅配ボックスを自作して、宅配便の受け取りに成功しましたhttps://t.co/FEsUzvtYZr pic.twitter.com/P1DuwTom8V
— 能登たわし (@nottawashi) March 1, 2017
封面圖片、資料來源連結：nottawashi／twitter
