相信大家細細就已經聽過《醜小鴨》嘅故事，不過可能而家印象有啲模糊啦，唔緊要，毛毛簡單講多次呀下：話說喺好耐好耐以前，鴨媽媽孵蛋生咗一竇鴨B出嚟，點知其中一隻好鬼樣衰喎，於是大家都叫佢做醜小鴨，又唔同佢玩又笑9佢咁，搞到佢不知幾sad，過咗一段日子，原來醜小鴨唔係鴨嚟㗎，只係天鵝媽媽孵蛋嗰陣唔小心碌咗隻蛋過去咋！佢終於都變做一隻靚天鵝，威盡全場喇，完！成個故事真係好勵志，好似童話版嘅《紅日》咁呀！

咦，咪住先……勵志？好似唔係好啱呢個形容詞喎。醜小鴨可以由醜小鴨變靚天鵝，唔係因為佢做咗啲咩努力，而係因為佢老竇老母係天鵝囉。有個泰國阿姨一早睇透呢個大道理，所以特登為呢個初生BB準備咗份大禮喇。BB啱啱出世易冷親呀，送張被仔畀佢就啱喇，不過呢張被笨唔係普通嘅棉被，而係200萬泰銖（即係大約44萬港紙）呀！

含住金鎖匙出世？out喇，用銀紙當被冚先係贏在起跑線囉！好多人就算大個咗都仲會攬住BB嗰陣張爛臭被仔，嗱，阿姨送畀你呢張被夠你買大把高級被啦，仲使乜攬嚟攬去都同一張呀！

阿姨，有錢就是任情吖嘛，你想送乜畀BB都冇問題㗎，送200萬畀佢做教育基金就直頭偉大啦，毛毛今次真係撐你㗎！不過錢呢家嘢，咁多人摸過掂過，你就咁鋪喺BB個身，好唔衛生啫。聽講一張銀紙就有3000種以上細菌，200萬蚊嘅1000蚊紙即係有幾多菌，不如你計一計先啦。

封面圖片、資料來源連結：騰訊新聞