【人肉生招牌】著咗一個晏晝啫 條褲啲字竟然印咗落腳度!

平時返工日坐夜坐,放假點可以唔做下運動郁下呀,咁先係陽光健康新一代吖嘛~行山就有得影靚人靚景,夠晒呃like,不過就攰啲囉;去gym房做機就有得對鏡自拍,畀人睇下條辛辛苦苦練返嚟嘅馬甲線(順便show埋事業線),都唔錯㗎,不過就要畀會費……但係,呢一切都唔會影響到我哋做運動嘅決心㗎!一於落樓下打返場friendly啦!

圖片來源: dcard

講緊friendly羽毛球呀!羽毛,有!球,有!我仲特登著埋條剔剔牌緊身褲𠻹!唔好以為做運動一定要著短褲啦,聽講呢啲褲可以保護膝頭哥,同埋預防肌肉酸痛㗎。上面仲大大隻字寫住「Just do it」,打到攰嘅時候望一望,即刻充滿力量呀!嚟啦,打多十場都仲得呀!

圖片來源: dcard

打咗成個晏晝,都係時候返屋企食飯喇,條緊身褲著咗成日,吸晒啲汗都臭晒喇,一除落嚟嗰下冇晒束縛真係好爽呀~!

圖片來源: dcard

咦,點解對腳,好似隱隱約約有幾隻字咁嘅?最新紋身術呀?遇熱識變色㗎?睇真啲,原來係條褲上面嘅字嚟呀,直接染咗啲黑白色落隻腳度都仲明發生咩事吖,而家只係得個印,點解釋先?唔通係曬痕嚟?

圖片來源: dcard

唔講都唔知,有網民話佢都試過呢種悲慘經歷呀。做個運動啫,無啦啦又會變咗人肉生招牌都有嘅!

圖片來源: dcard

有人話係曬痕,都有人話係因為印字嘅布料同條褲唔同彈性,所以印到隻腳咁樣樣,真正原因係咩呢……毛毛鬼知咩,淨係知以後買褲要小心啲咋!

圖片來源: dcard

不如你都係睇開啲啦,印句「Just do it」喺身都幾有型幾勵志吖係咪?好彩呢件衫唔會印字落個身度咋,唔係真係水洗都唔清呀!

 

封面圖片、資料來源連結:dcard

延伸閱讀:【招男友】老母買件咁嘅衫算係咩意思?

 

毛記電視網站 · 版權所有 · 不得轉載 Copyright © TVMOST.COM.HK All rights reserved