相信每個年代嘅小朋友都一樣，鍾意走嚟走去，喺公園跑跑跳跳、揈下鞦韆又瀡下滑梯咁嘅～不過時光可變世界可變呀，你不愛競爭但競爭會找上你吖嘛，唔想班細路哥轉晒去會所呀自修室呀度玩，公園都要upgrade自己，翻新下啲設施先得㗎！

最近，就有日本網民見到屋企附近個公園改裝緊喇。呢抽好似巨型香蕉咁嘅係咩嚟㗎？原來係新款滑梯呀！雖然話瀡滑梯落去只係幾秒鐘嘅事，不過撞正啱啱放學嘅繁忙時段，都好多小朋友排隊玩㗎嘛，一於將條滑梯一開三，咁咪可以將啲細路分流，唔使排咁耐隊囉～

不過咁喎，理想同現實，不嬲都一個東一個西㗎啦……陣間一瀡落去，對腳唔小心分開咗，一隻腳一條梯，咁咪變咗bombom爆丸人？！嗚呀，真係諗下都要召喚九叔呀……

想玩下滑梯啫，點解係都要人搵蛋搏喎！呢條疑似滑梯（有人話係排水道）嘅物體，就實實在在咁同大家上一堂成語課，說明咗以卵擊石嘅大道理喇。算罷啦細路，都係唔好去公園玩喇，返屋企做補習練習啦。

近所の公園が改装中やけど少年の股間を破壊するバナナ型処刑機が実装されてて施工完了が待ちきれん pic.twitter.com/5faQkLRudp

— トリッカー (@gsrgsrgsr) March 12, 2017

封面圖片、資料來源連結：gsrgsrgsr／twitter

延伸閱讀：【以卵擊石】瀡滑梯啫 唔使玩命嘅