每年差唔多到一至二月嘅時候，身邊總會有啲朋友明明好日都唔郁，突然之間話報咗去跑馬拉松喎！做咩咁睇唔開呀？仲要天未光就搭車出去跑，係勇氣可嘉嘅，但係成個FB都畀佢打卡洗版嗰陣，真係好想問佢究竟係跑步定影相呀？咩都好啦，馬拉松其中一樣必影嘅就梗係號碼布同選手包喇！

話晒畀咗報名費，個選手包都唔可以太hea嘅，起碼要有件衫同毛巾，仲有枝水或者運動飲品，再加啲乾糧咁啦～好似日本種子島嘅Rocket Marathon呢個咁就係完美示範喇。

有茶有糖又有蕃薯，跑完仲有飯糰同烏冬食，真係好幸福呀！但原來呢個選手包仲內有玄機㗎！

首先就係左下角嗰包神秘嘅謎之食品喇！個包裝上面有支火箭咁過癮嘅？唔通入面係火箭菜？種子島作為火箭發射嘅地點，呢個又叫Rocket Marathon，咁就梗係同太空有關啦～

呢包「宇宙食」咪臭係睇戲啲成日見太空人食嗰啲囉～咪睇佢黑猛猛一包咁，入面係章魚小丸子嚟㗎，睇落又幾香口啵～

呢支透明液體，如果你以為佢只係一支水，少年人，你實在太年輕喇！睇真啲上面啲字，真相只得一個！冇錯，呢支係一支酒，仲要係燒酒呀～如果跑手當佢水咁飲，咁咪越跑越high？好犯規呀！

有網友話，唔使驚，大會喺大廳～其實派嗰陣已經溫提晒啲跑手嗰支係酒，同埋叫佢哋跑完先准飲㗎喇，況且飲完你慌佢哋仲跑到直線咩～

係咪好吸引呢？唔係淨係講個選手包呀，講緊個馬拉松呀！睇完係咪好想出年飛去玩下順便影下相打卡呃like呢？可惜有消息話今年已經係最後一屆喇，果然，這些機會⋯⋯

封面圖片及資料來源：yukira1976／twitter、fcredlecs8／twitter、takumilog