【D.I.Y.達人】辛辛苦苦儲2000個樽蓋就係為咗幫廚房大翻新!

儲嘢係一門藝術,因為通常藝術嘅嘢,唔係人人都識欣賞,特別係你阿媽。無論你儲緊啲咩,只要你喺阿媽面前證明唔到啲嘢有用,阿媽都會話:「成日儲埋啲無謂嘢,冇用就掉咗佢啦」。話明儲嘢,最重要嘅作用咪就係儲囉,唔係點啫~其實有啲嘢儲完係真係有用㗎!

圖片來源:Boredpanda

呢家人用咗超過5年時間,儲咗二千幾個樽蓋,嘩,咁一年咪要儲成幾百個?放心,好似你哋儲印花咁,你話要儲,又點會得你一個儲呀,一班Fd子梗係會幫你儲埋一份㗎啦~更何況只係樽蓋呢?

圖片來源:Boredpanda

但係儲埋咁多樽蓋做咩先~唔通老竇細個儲開蓋掩,想將呢樣男人嘅浪漫傳畀仔女?原來係用嚟裝修廚房呀!仲搵埋阿仔阿女幫手分類𠻹,記得睇手呀,啲蓋邊都幾利㗎下~

圖片來源:Boredpanda

圖片來源:Boredpanda

睇唔出你哋又幾砌得喎!將啲樽蓋一個個砌喺個L字檯,仲要跟埋顏色咁,但係啲樽蓋唔會個個一樣㗎嘛~凹凹凸凸咁,會唔會好睇唔好用㗎?所以屋主就話,呢個工程最難就係要排到個面夠平,咁倒啲樹脂落去固定嗰陣先唔會積喺一個位度喎。

圖片來源:Boredpanda

為咗製成品唔會望落一截截色咁死板,屋主仲特登唔將一種顏色同另一種嘅顏色嘅樽蓋分得咁清楚,等張檯嘅Pattern好似自然漸變咁𠻹~

圖片來源:Boredpanda

個完成品又幾特別喎~仲好環保𠻹!屋主話最緊要係喺整檯嘅過程入面,屋企人互相交流去做好一件事,咁又真係寧舍有滿足感嘅~儲咗5年,就係為咗整一張檯,值唔值得就見仁見智啦~話晒自己屋企,最緊要係自己鍾意啫係咪?

封面圖片及資料來源:Boredpanda

毛記電視網站 · 版權所有 · 不得轉載 Copyright © TVMOST.COM.HK All rights reserved