【搵食艱難】你肯定扮鸚鵡影相真係對賣樓有幫助?

而家樓價咁高,個個都以為做地產一定好好搵啦~其實風光嘅背後,佢哋嘅辛酸又有邊個知吖,成日要帶啲客周圍睇樓,啲客又鍾意嫌三嫌四壓價,有時仲要出賣良心,明明間屋似棺材,都要吹到似諾士佛臺。估唔到而家仲要出賣埋肉體呀!

圖片來源:Rightmove

呢個單位坐享無敵山景,一望無際⋯⋯仲有一隻雀𠻹!喂,賣樓啫,唔使做雞⋯⋯Sor,係做雀下化?呢間英國嘅地產代理,話見賣家咁玩得,於是咪同佢玩大佢囉!

圖片來源:Rightmove

圖片來源:Rightmove

古有雕兄幫小龍女同楊過看屋,今有鸚鵡兄幫經紀賣樓,鸚鵡兄真係唔話得,仲特登換返套飲衫嚟介紹個飯廳𠻹!

圖片來源:Rightmove

「個天台都幾闊落㗎,得閒仲可以同班雀友一齊撚下雀,BBQ下𠻹!」

雀兄,睇L住呀,燒還燒,一陣燒埋自己做紅燒鸚鵡就唔好啦!

圖片來源:Rightmove

「金絲雀~金絲雀~金色美麗似鳳⋯⋯」但雀兄,你鸚鵡嚟㗎喎。呢啲咪正宗瞓身演出囉!咩話?瞓埋喺張床都唔夠瞓身?咁得喇啩!

圖片來源:

高清冇格仔出浴照流出!嘩,雀兄真係犧牲埋色相,連出浴照都幫你影埋,仲要冇著衫淨係帶住頂浴帽咋,真的暴露鳥!

咁賣樓法,係咪真係得㗎?地產代理嘅發炎人就話,自從雀兄一出,真係多咗好多人話要睇呢間屋呀!但係間屋而家都仲放緊盤喎⋯⋯梗係啦!你估啲人真係想睇樓咩,想睇雀兄真人咋~一於請雀兄做代言人,專係陪大家睇樓,睇樓團承惠每人三嚿,一定商機無限啫!
 

封面圖片及資料來源:Rightmove

毛記電視網站 · 版權所有 · 不得轉載 Copyright © TVMOST.COM.HK All rights reserved