【訓練員必備】新出精靈球食玩放糖又得 掛埋喺腰上面都得!

之前興Pokemon Go嘅時候,周街都係Pokemon嘅嘢,唔止有公仔同玩具,仲連精靈球尿袋都有𠻹~老老竇竇,拎起個精靈球尿袋嗰陣,真係有股衝動想掉佢出去呀!

圖片來源:Pokerin

而最近,日本又推出咗新嘅寵物小精靈食玩,今次係一套11款嘅精靈球糖盒,仲要係金屬色嘅精靈球糖盒嚟呀!望落果然靚過之前廿蚊卅蚊扭一粒嗰啲扭蛋殻呀下。其實之前官方都有情報會出呢套食玩,但係到咗今個月先發佈完整資訊同埋開始預售咋。

圖片來源:Pokerin

呢個糖盒最吸引嘅地方就係可以掛喺腰上面!以前出啲精靈球咁大粒,想好似動畫主角咁掛六粒喺腰度都唔得,而家新出呢款size啱啱好,仲有埋個掛夾畀你夾住喺腰間,訓練員,你唔係唔買呀?

圖片來源:Pokerin

話明喺糖盒,入面梗係放糖㗎啦,跟佢Set買會跟埋薄荷糖,唔鍾意嘅話,你都可以拆咗個糖隔放自己鍾意嘅精靈公仔入去嘅~

圖片來源:Pokerin

暫時就有兩Set可以揀,一Set係全11種11個波連六個夾,價錢係7,020円。另一種賣5,400円都有10個波,雖然聽落好似抵啲,但係入面只會有6種波,咁咪一定有重複?

圖片來源:Pokerin

不過5,400呢set最大嘅賣點除咗平,係有特別版嘅比卡超精靈球呀!想扮小智嘅話,你知要訂邊set啦?幾時有得訂?開始咗啦,你唔知咩?唉⋯⋯但係扮到小智又點呀,咪又係冇佢咁多女⋯⋯

 

 

 

封面圖片及資料來源:Pokerin

毛記電視網站 · 版權所有 · 不得轉載 Copyright © TVMOST.COM.HK All rights reserved