細個淨係識鱷魚英文係Crocodile，但係而家啲細路已經學緊Alligator，即係短吻鱷喇！你問短吻鱷同普通鱷魚有咩分別？短啲囉⋯⋯個嘴。Any肥，無論鱷魚定短吻鱷，撞到佢哋嗰陣，唔好話小朋友吖，大人都淆晒底啦！

但係美國呢個10歲嘅小妹妹Juliana，唔止識串Alligator，仲要畀短吻鱷咬住隻腳都未驚過，兩隻手指就KO咗佢，嚇到條短吻鱷走夾唔抖呀！

是咁的，妹妹見天時暑熱，咪去公園游個靚水囉，得個兩尺水深，應該冇咩嘅，點知居然畀短吻鱷咬住咗隻腳呀！

喺呢個咁危急嘅毛文，佢做咗一個決定。就係伸出兩隻手指向前插，插落去短吻鱷嗰兩個鼻哥窿度呀！呢招雙龍出海咁熟嘅？

咪臭係星爺喺上海灘賭聖度出過囉！唔通妹妹都係星爺fans?

妹妹仲識好似局長咁教，係咁挖晒入面啲空氣出嚟，終於令到短吻鱷鬆口走人喇！乜打電話問功夫開咗條英文線咩？原來妹妹唔係識王局長，係佢之前留心聽書啫～佢話之前去過個短吻鱷主題公園，入面有人咁樣教過佢㗎喎。

睇妹妹做訪問嗰陣，起勢咁舞隻鱷魚公仔，似乎佢都冇畀條短尾鱷嚇親喎。妹妹隻腳最後縫咗幾針，休養下都應該冇咩大礙㗎喇。

不過呢隻揀錯人咬嘅短吻鱷就慘喇⋯⋯畀人捉到仲畀人殺埋呀！唉⋯⋯其實唔係人類一步一步入侵咗佢哋嘅棲息地，影響咗佢哋生活，啲短吻鱷又點會想襲擊人類吖？唯有同鱷魚仔講聲R.I.P.啦⋯⋯

封面圖片及資料來源：abc News、the Telegraph、電影《賭俠II之上海灘賭聖》截圖、JSalomoneWFTV​／twitter