做人阿媽嘅，就覺得「打在兒身，痛在母心」，其實做主人嘅都好明白呢種感受㗎，傷在寵物身，痛在主人心呀！見到自己嘅心肝寶貝受咗傷要睇醫生，做主人嘅除咗擔心同心痛之外，仲一定會好內疚，怪自己點解唔好好咁看實佢，令到有意外發生！呢個時候，身邊嘅人唔通淨係講句「發生啲咁嘅事，大家都唔想」咩？

澳洲就個有一位動物護士，喺兩年前開始幫受傷寵物喺石膏上面畫公仔喇。通常大家見到寵物受傷，都會流露出擔心、惋惜嘅神情，但係如果見到石膏上面色彩繽紛嘅公仔，咪會微微一笑囉，咁做唔只可以令主人個心好過啲，相信寵物見到主人笑，都會堅強啲振作啲嘅！

啲公仔畫得咁趣緻，狗狗個樣又咁打耳，你叫人望邊度好喎！對眼好攰呀大佬！

唔好以為啲公仔只係好似你見個隊友踢波整親之後喺石膏上面亂咁畫嗰種level呀，護士全部都係用私人時間畫㗎，每條繃帶要畫半個鐘至三個鐘，咁都肯制，真係有好愛心呀！狗狗，大家都咁錫你，你要食多啲嘢、休息多啲，乖乖地快啲好返呀，知唔知呀！

封面圖片、資料來源連結：Mashable