深夜放毒嘅人真係好可恥！有時明明自己一啲都唔肚餓，以為終於可以忍到口唔食宵夜㗎嘛，點知當見到fd子喺挨豬post好西相嘅時候，自己個肚又唔爭氣，突然餓到打晒鼓咁喎！ok fine，咁遠離挨豬應該就冇事啦？點知原來上網睇下頭飾都會睇到餓⋯⋯

唉，毛毛講緊嘅咪係呢啲食物模型頭箍囉！生蛋豉油撈飯又有，鬆軟蜜瓜包都有，而且款款頭箍都整得到好似真嘅一樣咁?，睇見想話唔肚餓都幾難喇！

大家睇下呢款生蛋豉油撈飯頭箍，蛋黃顏色靚、有光澤，而豉油平均分佈喺每一啖飯上面，有啲仲要好似就嚟滴落嚟咁，真係睇到毛毛好想擺個頭箍落口呀！

另外呢款肉肉頭箍又夠juicy，一睇就知係上等靚肉嚟呢～

仲有呢款炒飯頭箍，粒粒飯炒到金黃色咁，材料又足，蝦仁又夠大隻，餓依思呢！

唉，都唔明日本人將啲食物模型整到咁逼真做乜！下下都咁咁逼真，好易搞到人哋肚仔打鼓㗎嘛！嗱嗱嗱，好似呢款淘寶小強髮夾咁就唔同呢，睇見就想拍死佢，咁咪唔會睇到肚餓囉，55。

資料來源：日本樂天市場、淘寶

睇埋：【幾可亂真】以為件衫黐咗幾粒米 點知原來係心口針嚟