好多人以為女仔讀Engine實大把兵收好爽歪歪啦～可能係嘅，弊在有兵有兄弟，就係冇姊妹呢，突然嚟M嘅話，想搵人借塊M巾都難呀⋯⋯

好似呢位靚女妹豬咁，讀Engine不特止，仲要係讀電腦工程，呢啲系出晒名陽盛陰衰，出到嚟做嘢，咪又係同返班毒L一齊玩⋯⋯就算結婚都搵唔到人做姊妹啦！

做兄弟嘅嘢，刀山去地獄去又何憾！冇姊妹團咪組兄弟班囉～呢班兄弟仲好夠義氣咁一齊著返套粉紅色睡袍同妹豬影婚前Party相呀！

話晒呢個係新娘婚前Party，梗係要一齊扮下靚敷下青瓜，執返個靚樣啦～你幫我剃鬚，我幫你化妝咁，真係好Sweet呀～

連跟咗自己咁多年嘅腳毛都一齊剃咁捨得？呢啲咪臭係愛囉哈利～

喺啲相度可以睇得出，呢班兄弟真係當正妹豬係自己個妹咁鍚㗎。有呢班咁好嘅兄弟，其實冇姊妹又有咩好怕喎～

見到呢個咁溫馨嘅場面，毛毛真係戥妹豬個準老公擔心，如果第時佢得罪咗妹豬，呢班兄弟肯肯定唔放過佢呀！

btw，事實證明，讀Engine同電腦之類嘅毒L都可能係暖男潛力股嚟㗎，女士們不如諗諗佢吖？冇～毛毛邊係sell緊自己啫，你諗多咗喇～

封面圖片及資料來源：Boredpanda