【毛記專訪】台灣同志淚流滿面向爸爸媽媽告白

早前台灣司法院大法官釋憲支持同性婚姻合法化,同志平權又邁進一大步。
毛毛於是深入台灣,為同性婚姻議題進行小探究,搵咗台南嘅Ginny,請她用同志嘅身分,講下對同志平權嘅睇法。
聽到Ginny話佢淚流滿面咁向媽媽爸爸告白嘅時候,毛毛個鼻都好酸呀……

 

對台灣成為第一個保障同志婚權嘅亞洲地區有咩睇法?

Ginny話,覺得爭取到婚姻平權係好事,不過其實又唔係好雀躍。對佢而言,結婚係人應有嘅權利,係尊重人嘅基本,唔係值得特別興奮嘅事。婚姻平權應該一直存在,只係呢個世界不停壓榨人們應該有嘅權利。

 

妳認為同志有冇權利結婚?

 Ginny近乎秒答:「有啊!」佢認為喺唔傷害到其他人嘅情況下,大家都有權利去追求令自己開心幸福嘅事,唔一定限制於同性戀呢個議題。

毛毛再問:「其實在台灣的教育或是家庭會有很強的男女定型嗎?」Ginny話從小就覺得每個人都一樣,屋企人同學校都冇特別嘅性別定型,反而身邊嘅女仔朋友都係比較強悍。Ginny仲笑住講:「我自己都是強悍的人啊!你都可以做,為什麼我不能做!」毛毛再望望佢隻手,話佢好瘦。Ginny就即刻話自己係有肌肉㗎! 哈哈~ 係啊!強悍同強壯唔係一樣呢~

爸爸媽媽知唔知? 佢哋點睇妳?

Ginny話,因為呢件事喊咗好多次,好擔心爸爸媽媽承受唔到。其實佢開頭冇刻意同爸爸媽媽講,只係佢哋之間有心靈感應,感應到之後,爸爸媽媽就旁敲側擊。最後Ginny都選擇同佢哋坦白。Ginny話每次面對面講嘅時候,自己都會淚流滿面。

 

比較保守嘅媽媽

「人家的孩子可以是同志,只要不是自己孩子就可以了」,Ginny嘅媽媽大概就係呢種心態。Ginny笑住話:「媽媽開闊的心胸,只是對別人而言。」就好似見到其他人穿舌環就OK, 仲會話幾靚,但發生喺自己仔女身上,就會變得好抗拒。雖然講到咁,但佢一啲都冇唔開心,因為佢知道媽媽好愛自己,只係保守觀念唔可以一時三刻話改就改到。

 

難得開明嘅爸爸

Ginny話真正同爸爸坦白,係喺佢哋單獨飲酒傾偈嘅時候。爸爸講笑咁講:「你交了兩個男朋友,還是三個?」 Ginny靜靜咁答佢:「不是男朋友,是女朋友啦。」嗰一刻,爸爸好似定咗鏡咁,隔幾秒先話:「沒有什麼啦!這是小事,你看爸爸臉書都掛彩虹旗(LGBTQ平權運動的符號)喔。」但其實爸爸喺一開始知道女兒係同性戀嘅時候,內心有好大嘅掙扎,例如唔知要點面對阿女嘅女朋友,唔知可唔可以將阿女嘅女朋友當成自己個女等等。不過呢一切都係初頭嘅事,Ginny話佢哋而家相處得好好,仲會一齊食飯傾偈𠻹!

 

妳身邊有冇其他同志朋友?

Ginny嘅同志朋友都唔少,但唔係每個都好似佢咁幸運。佢身邊有一個靚仔到好似余文樂,man到好似王宗堯咁嘅朋友,但因為家庭環境問題,爸爸媽媽對佢寄予厚望。佢爸爸仲成日問佢點解唔帶埋女朋友返屋企食飯,仲曾經講過「你要是給我搞GAY,我就把你趕出家門。」Ginny話第一次聽佢嘅故事就聽到喊。

 

你覺得反對同性戀嘅人係唔係你地前進嘅動力?

Ginny話反對嘅人都有權利表達佢哋自己嘅意見,只可以將佢哋講嘅嘢分為適當或者唔適當。佢話難聽嘅說話有好多,不過通常笑下就算。

雖然自己得到家人接受、台灣都開始保障同志婚權,但Ginny始終認為,用「同性戀」去稱呼人係一件唔太禮貌嘅事,我哋應該一視同仁,視社會上嘅同性伴侶為正常嘅情況,而唔係一個特別標籤。

毛記電視網站 · 版權所有 · 不得轉載 Copyright © TVMOST.COM.HK All rights reserved