讀書嗰時作文寫咩《我的偶像》、《我心目中的英雄》，實十個有九個都寫自己老竇㗎，不過而家自己都咁大個人喇，老竇呢個英雄當然都會老啦，睇住佢為咗頭家捱咗咁多年，梗係想佢盡量休息多啲，唔想佢咁辛苦嘅。
佢就係嚟自美國LA嘅18歲靚靚model Justine Biticon喇，參加過America's Next Top Model，人氣都幾高㗎，成日都要去世界各地做嘢，做老竇嘅梗係會管接管送啦～
最近就有一次，阿女叫爸爸唔使去接佢機啵，其實唔接一次半次有幾閒啫，但老竇竟然諗錯隔籬，見阿女之前又唔同自己去做gym，而家就叫佢唔使接機，就以為個女嫌自己老呀……雖然阿女已經係咁話「I love u」想氹返爸爸，但佢都依然繼續跌落自己幻想出嚟嘅深淵，講到自己呢個老嘢會同阿女斷絕聯絡咁……
當阿女再搵多次爸爸嘅時候，佢仲要話「你所打嘅電話號碼已經死咗，唔好諗住再打嚟。如果你真係再打，就會收你長途電話費，因為天堂真係好很遠。不過好遺憾，你爸爸唔喺天堂，而打去地獄嘅電話費會更加貴。」
喂大佬，唔接一次機啫，使唔使講到又天堂又地獄咁大呀……
唉，當大家都以為呢個廿四孝爸爸受到好大打擊，直頭要飲酒墜落嘅時候，阿女竟然收到朋友影嘅相，發現原來爸爸同FD歎緊甜品囉！爸爸畀阿女踢爆之後，仲要話「你朋友應該要為偷拍一個咁性感嘅男人而感到羞愧」。仲識講笑話自己sexy，即係冇事啦老竇！
喺老竇眼中，阿女永遠都係細路女，要佢好似接返學放學咁照顧嘅；但原來調返轉，老竇就算已經幾廿歲，都一樣係個大細路，要屋企人陪、要屋企人氹㗎。
everytime i cancel any plan with my dad he does this whole thing to me and i realize where my extra-ness comes from pic.twitter.com/sCaNuOVdsD
— justine (@biticonjustine) May 27, 2017
封面圖片、資料來源連結：biticonjustine／twitter
《大細路老竇系列》
