細細個去人哋屋企真係好羨慕人哋有齊成套停車場玩具，可以僭建十幾層，再加埋360度亡命飛車圈，再落個升降機，然後直出停車位，一撞一泊，搞掂！仲勁過一帶一路呀！

估唔到呢個玩具落到去日本網民嘅手，竟然玩得更出神入化呀！一開閘車仔就應聲彈出，向住康莊大道進發，跟住追追趕趕又高高低低咁，其實都冇咩特別吖，究竟有咩令到一班網民瘋傳呢？

話口未完，架車仔跟住成功搭上升降機落下層，一出直路⋯⋯哎吔，竟然撞車呀！都叫你唔好咁衝動啦，會車毀人亡㗎嘛。但係你以為咁就完？少年人，你太年輕啦！而家先係戲肉呀，觸動機關之後，列車形嘅基地慢慢打開⋯⋯「嘭！」

搞咁多嘢，原來只係為咗最後撞入便利店嘅呢一刻。最緊要嘅係，原來呢個場景係參照現實，還原幾年前私家車撞入便利店嘅現場㗎！連架車都似到十足十，唔通佢今次砌呢個玩具就係要還原意外嘅真相？雖然咁玩法係有啲衰，但係有好多網民表示，睇到最尾忍唔住笑咗⋯⋯從今次嘅社會實驗我哋可以睇到，無論邊度人，都係睇人＿街最開心。

封面圖片及資料來源：natsume_nago／twitter

トミカのプリウスで遊ぶ動画 pic.twitter.com/vMDr1ZZmfy

— なつめ (@natsume_nago) January 21, 2017