2017年02月27日 星期一
【喊出嚟】點解會有隻蜘蛛喺我個銀包度結網㗎！
如果問到最驚嘅昆蟲係咩，應該唔少人都會話係蜘蛛呀！咪住先，昆蟲嘅定義係有6隻腳，蜘蛛有成8隻腳，唔算係昆蟲㗎……我X！我理得佢幾多隻腳呀，總之又成身毛又幾廿隻眼仲要爬得勁快咁核突我就頂佢唔順啦，理得佢咩類啫！真係諗下都打晒冷震呀，千祈唔好畀我見到佢?呀！
OK，唔見到，咁掂到囉？好多人攝隻手指入銀包摷散紙嘅時候都唔會望實嚟摷，淨係憑手感估拎到咩硬幣嘅，厚厚地嘅圓形咪五蚊囉，有啲波浪紋咪兩蚊囉～咦，呢個……點解一條條咁嘅？嘩X！望一望先知原來成隻蜘蛛仔匿咗喺入面呀！喺個銀包度有隻蜘蛛出現已經夠崩潰，仲要網都結埋係咪諗住喺度成家立室安居置業開枝散葉先……諗到呢度真係好有喊出嚟嘅衝動。
唔好咁啦，其實蜘蛛匿得喺銀包，都唔慌大隻得去邊啦，彈一彈，咪當乜事都冇囉！好過呢個網民，想聽歌嘅時候一拎上手，先發現個耳筒同蜘蛛屍體撈埋一嚿吖……
咁都未算最慘呀，最慘係隻蜘蛛標本係聖上賞賜嘅大禮嚟，佢掉咗又去又唔係，唔掉又唔係咁呀陰公！
封面圖片、資料來源連結：livedoor、彭君瑜／貓咪也瘋狂俱樂部 CrazyCat club
