有養狗狗嘅人就知，養狗最大嘅挑戰就係制止狗狗亂咁食嘢。因為汪星人真係好為食，偏偏有好多嘢佢哋都唔食得㗎！雖然好多主人都已經設下天羅地網想阻止佢哋，但係道高一尺，汪高一尺，汪星人唔使好似喵星人咁用超高智慧犯案，只要用武力就可以解決晒所有問題喇！

是咁的，某日台灣網友返到屋企，就見到呢件充滿張力嘅藝術品。嗰種隨意而優雅嘅形態，仲要寧寧舍舍有條好似攀藤咁扭出嚟，個意境高到呢⋯⋯唔講唔知，呢件藝術品仲係用牙咬出嚟㗎！而整呢件嘢出嚟嘅就係網友屋企嘅汪星人喇。

呢隻狗狗唔係狗界畢加索，佢只係想食嘢啫，而呢件藝術品嘅前身竟然係主人放入雪櫃嘅肉醬罐頭呀！唔識用罐頭刀嘅狗狗，爆開咗個雪櫃之後，居然直接用牙就咬到個罐頭咁樣。最神奇嘅係，主人幫佢檢查完個口，狗狗個口乜事都冇喎！

原來狗狗已經有前科㗎喇，之前主人唔想佢亂食嘢就加咗個安全鎖落雪櫃，點知汪星人為咗食燒酒螺竟然直接咬爛佢，真係名符其實嘅鐵齒銅牙呀！咪咪姐都唔夠你嚟啦，唔通你偷偷哋去過深圳整牙？

咪以為有牙力就唔使罰喎！主人唔怕你有牙㗎！弊在怕你嘅可愛攻勢呢，狗狗竟然出跪低呢招，仲要眼晴水汪汪咁望住你，咁⋯⋯你叫主人點罰得落喎⋯⋯今次又畀為食嘅狗狗奸計得逞喇，你就開心，難為主人又要諗過第二條橋嚟鎖雪櫃呀！

封要圖片及資料來源：楊雅莉