細細個睇武俠劇，真係羨慕啲主角㗎，唔止武功高強，只要你有主角光環，就死極都死唔去，仲會有成班美女圍住你轉?！最緊要係啲劇情成日都安排佢哋要同啲靚女除衫練功，大大力咁幫佢哋啜⋯⋯毒療傷，其實呢啲咁粗重嘅嘢交畀我哋啲後生啦好嗎？

細個睇都唔明點解要練功要除衫，大個就明晒喇！肯肯定係太熱，你睇佢哋次次都熱到出煙咁，唔除衫點得啫？呢啲火熱得嚟又咁清涼嘅場景，真係為一眾少男嘅少年十五十六時提供咗無限嘅FF呀⋯⋯

最近中國有個藝人，竟然自行流出一輯練功相呀！雖然同那些年我哋睇過啲女神比係爭咁啲，但係個香肩都睇得下吖，仲要嗰木桶啲煙係咁升上嚟咁有仙氣，又幾惹人遐想嘅。當事人仲益街坊，PO埋下半身畀大家睇呀！嘩，咁香艷？會唔會畀人Port㗎！

X你，褲都除埋你畀啲咁嘅嘢我睇？唉⋯⋯Mola mola⋯⋯咩幻想都冇喇⋯⋯雖然本來都已經冇咩幻想，但係都唔使連毒L嘅少少希望都扼殺埋下化？

唔止一啲都唔香艷，仲要有三隻小豬一齊用佢哋嗰對水汪汪嘅大眼睛望住你⋯⋯毛毛知喇！原來唔係拍緊武俠片，係拍緊三隻小豬煲緊隻大灰狼呀！唔怪得之咁大煙啦⋯⋯係冇開抽氣扇定係霧霾嚟㗎？

其實令人幻想破滅嘅又點止武俠片吖，如果你上網搵返啲CG大片嘅幕後片段，咪又淨係睇到一堆綠色嘅人喺啲綠色布度唔知做乜9？都係嗰句，有些事情就不要拆穿啦⋯⋯

封面圖片及資料來源：沈夢辰／微博