啊啊啊～點解毛毛咁晏仲喺度打喊露？唔係因為食飽飽，飯氣攻心呀，而係堅眼瞓囉！鬼咩，話就話back after lunch啫，不過住屯門嘅毛毛，都要一早起身搭車出嚟市區㗎嘛，仲要預時間畀條屯門公路慢慢塞，唔夠瞓呢家嘢，慣㗎喇。早幾日聽到奶媽話攰攰、唔想去天水圍咁遠，所以就放基層團體飛機，真係好葡萄囉！

嗱，奶媽競選辦公室就喺灣仔嘅，當由灣仔去天水圍啦，奶媽身份咁尊貴，應該都唔敢唔會迫巴士迫地鐵㗎喇，揸車都係39分鐘啫（Google話）。

不過一眾打工仔就慘啲喇，養唔起車，咪迫巴士迫地鐵囉，港鐵App就話47分鐘，不過計埋轉車同延誤，個幾鐘都走唔甩㗎喇，計返來回都係三個鐘咋嘛！車行又唔係你自己行，唔係咁都怨下話！

一日有24粒鐘，咁香港人又花咗幾多時間喺車上面呢？2011年交通習慣調查就話搭公共交通係平均43分鐘一程，揸車同的士係廿幾分鐘咁，都唔係好耐啫。不過留意返，講緊平均呀下，唔好忘記堅毅物種新界西人點樣返工放工呀！

另外，每程車嘅搭車次數係1.17 次，即係話好多人都要轉車㗎，計埋轉車時間，真係要早好多起身返工。

雖然香港話大唔大話細唔細，不過跨區工作對打工仔嚟講始終都係痛苦嘅。計一計，香港有成140萬人要跨區工作㗎，真係辛苦晒！每日見到啲上到車就唔肯行入啲，搞到車門個位迫到死死下嘅情境，就好似學奶媽咁講句，今日比較攰，唔想去咁遠返工…… 不過，相信奶媽都係知條路已經夠塞，唔想阻大家返工放工先唔入天水園啫，肯定係！

資料來源連結： 2011年人口普查、2011年交通習慣調查