【職員亂入注意】未等到米奇出嚟咪同清潔哥哥影住先囉

迪迪尼係一個充滿Magic嘅地方,唔止係啲卡通人物,上上下下嘅員工,就連個垃圾桶都可以帶畀你無盡嘅實派士同Magical 毛文呀!

香港代表就有cute出國際嘅垃圾桶「小推」,之前畀台灣網友拍咗段片放上網之後就爆紅喇!而喺港女最愛嘅東京迪迪尼入面,都出咗個鬼馬可愛嘅清潔哥哥喎!

圖片來源:Hiro K/Youtube

咪以為做清潔冇料到呀,就好似睇武俠小說咁,通常喺門口掃地嗰個先係高手高手高高手呀!呢位清潔哥哥嘅殺手鐧就係佢手上嘅清潔架撑!只要一出手,就會發出啲好打耳嘅音效㗎喇!

圖片來源:うぐいすもち/Youtube

圖片來源:うぐいすもち/Youtube

仲可以演奏埋首歌出嚟𠻹呀!之前有一段片就係影住呢個哥哥掃掃下個小魚仙花樽,居然彈咗小魚仙首 《Under the Sea》出嚟呀!

圖片來源 :tiny_sorao/twitter

最近就有網友影到呢張相。點解好似有啲嘢唔同咗咁嘅?搵高飛要等25分鐘⋯⋯米奇就要45分鐘⋯⋯咦!有個唔使等喎!乜又係你呀,清潔哥哥?

為咗帶大家睇真啲成個過程,所以毛毛唯有用穿越能力,帶大家睇返過去嘅表演片段嚟重組案情啦!

圖片來源:Mosquitoチャンネル/Youtube

咦?清潔哥哥望住塊牌做咩呢?唔通米奇塊面污糟咗?

圖片來源:Mosquitoチャンネル/Youtube

佢鬼鬼鼠鼠咁望完周圍冇人留意到佢,就行過去打開個垃圾桶蓋嘞!

圖片來源:Mosquitoチャンネル/Youtube

原來個相框就係垃圾桶蓋!果然係古惑的垃圾桶呀下~哥哥你使唔使咁有表演慾呀,趁米奇同成班朋友唔喺度就搶Fans? 

圖片來源:Mosquitoチャンネル/Youtube

圖片來源:Mosquitoチャンネル/Youtube

不過清潔哥哥平日啲表演咁精彩,自己都有大把Fans啦~使咩搶喎~一打開個蓋,大家都爭住幫佢影相呀!清潔哥哥都冇令大家失望,表情多多,等大家影到夠為止呀~

圖片來源:mittalog/twitter

其實呢位清潔哥哥叫峯崎圭輔,係一名專業嘅敲擊樂表演者嚟㗎!如果想睇到佢喺迪迪尼嘅其他精彩表演,只要喺Youtube度打ミネザキさん,就可以搵到好多㗎喇!所以話,樂園入面真係臥虎藏龍㗎~下次去,記得望清楚周圍,話唔定高手就喺你隔籬咋!

 

 

 

封面圖片及資料來源:tiny_sorao/twitterうぐいすもち/YoutubeMosquitoチャンネル/Youtubemittalog/twitterHiro K/Youtube

毛記電視網站 · 版權所有 · 不得轉載 Copyright © TVMOST.COM.HK All rights reserved