迪迪尼係一個充滿Magic嘅地方，唔止係啲卡通人物，上上下下嘅員工，就連個垃圾桶都可以帶畀你無盡嘅實派士同Magical 毛文呀！

香港代表就有cute出國際嘅垃圾桶「小推」，之前畀台灣網友拍咗段片放上網之後就爆紅喇！而喺港女最愛嘅東京迪迪尼入面，都出咗個鬼馬可愛嘅清潔哥哥喎！

咪以為做清潔冇料到呀，就好似睇武俠小說咁，通常喺門口掃地嗰個先係高手高手高高手呀！呢位清潔哥哥嘅殺手鐧就係佢手上嘅清潔架撑！只要一出手，就會發出啲好打耳嘅音效㗎喇！

仲可以演奏埋首歌出嚟?呀！之前有一段片就係影住呢個哥哥掃掃下個小魚仙花樽，居然彈咗小魚仙首 《Under the Sea》出嚟呀！

最近就有網友影到呢張相。點解好似有啲嘢唔同咗咁嘅？搵高飛要等25分鐘⋯⋯米奇就要45分鐘⋯⋯咦！有個唔使等喎！乜又係你呀，清潔哥哥？

為咗帶大家睇真啲成個過程，所以毛毛唯有用穿越能力，帶大家睇返過去嘅表演片段嚟重組案情啦！

咦？清潔哥哥望住塊牌做咩呢？唔通米奇塊面污糟咗？

佢鬼鬼鼠鼠咁望完周圍冇人留意到佢，就行過去打開個垃圾桶蓋嘞！

原來個相框就係垃圾桶蓋！果然係古惑的垃圾桶呀下～哥哥你使唔使咁有表演慾呀，趁米奇同成班朋友唔喺度就搶Fans? 

不過清潔哥哥平日啲表演咁精彩，自己都有大把Fans啦～使咩搶喎～一打開個蓋，大家都爭住幫佢影相呀！清潔哥哥都冇令大家失望，表情多多，等大家影到夠為止呀～

其實呢位清潔哥哥叫峯崎圭輔，係一名專業嘅敲擊樂表演者嚟㗎！如果想睇到佢喺迪迪尼嘅其他精彩表演，只要喺Youtube度打ミネザキさん，就可以搵到好多㗎喇！所以話，樂園入面真係臥虎藏龍㗎～下次去，記得望清楚周圍，話唔定高手就喺你隔籬咋！

封面圖片及資料來源：tiny_sorao／twitter、うぐいすもち／Youtube、Mosquitoチャンネル／Youtube、mittalog／twitter、Hiro K／Youtube