【唔使用劍】用水樽就可以整到小強捕捉神器?

喺屋企最可怕嘅事,就係有啲啡啡地、大大地、行動迅速嘅不明飛行物體出現!因為佢哋十成九就係由遠古生存到而家嘅小強呀!

人類同小強嘅鬥爭持續咗咁多年,人類用過嘅捕捉方法雖然層出不窮,但係生命力極強嘅小強,依然野火燒不盡,春風吹又生咁瘋狂出現⋯⋯

圖片來源:Raistamala Nediasani

用藥餌怕小強有抗藥性,咪用啲天然啲嘅方法囉~印尼嘅網友就教大家用水樽嚟捉小強,你睇佢仲捉咗成1/4樽咁多呀!

材料好簡單,糖呢就兩茶匙,仲有啲橙皮𠻹⋯⋯又邊L個拎呢份食譜出嚟呀?糖就係糖,不過係1湯匙咁多,仲有啲棉花、油同水,最重要就梗係有個樽啦~

圖片來源:Raistamala Nediasani

網友就將樽頭嗰三分一切出嚟,然後放嚿棉花喺個樽底,倒啲糖又倒啲水落棉花度,跟住用油搽勻個樽。再之後就將個樽頭倒轉插入去~用膠紙黐實個樽,再放嚿捕捉器去多小強出沒嘅地方就得㗎喇!

圖片來源:Raistamala Nediasani

睇落係咪又簡單又易整呢?不過一諗到第二日見到啲小強嘅屍體如果多到有成大半樽,就即刻毛管都戙起晒喇⋯⋯大家要有心理準備面對屋企殘酷嘅真相先好試呀。

 

 

 

封面圖片及資料來源:Raistamala Nediasani

毛記電視網站 · 版權所有 · 不得轉載 Copyright © TVMOST.COM.HK All rights reserved