2017年04月25日 星期二
【飲返杯勝嘅】邊個擺支燒肉汁喺自動販賣機入面咁搞鬼呀？
點解毛毛又講自動販賣機？因為日本真係一街都係自動販賣機，多到梗係一部喺你左近囉！雖然日本嘅自動販賣機出曬名多款式，好似鮮花呀、炸物呀、摺紙作品呀咁，幾乎你講得出嘅商品都買到，不過講到最多嘅，當然都係飲品啦，唔係我哋又點會叫自動販賣機做汽水機啵～
講咗咁耐，都開始口乾喇，就算口水多過茶都一樣要飲返啖嘢濕濕個口嘅，睇下呢部汽水機有咩賣先～有運動飲品，有水，仲有……咦，我冇眼花下話？係燒肉汁？！雖然大家都係液體啫，但都冇奶油直接飲支燒肉汁落肚啩？唔好以為大家都係一支支，我就睇唔出你係燒肉汁喎！冇用㗎，好似你啲咁出色嘅燒肉汁，無論喺咩地方，都好似漆黑中嘅螢火蟲一樣，咁鮮明，咁出眾！
算喇算喇，睇埋其餘有咩揀喇，原來燒肉汁隔籬再隔籬係香口珠；下一行就有味淋、蕃茄醬、蕎麥麵豉油……呢個一定係商業陰謀嚟，你行行下街覺得肚餓，咪買支燒肉汁或者蕃茄醬呃自己，望梅止渴囉，飲完咁濃味嘅醬料，又實口渴㗎，咪會幫襯佢買支水嚟飲囉，真係商機無限呀！
少年，你以為喺汽水機有醬料賣已經好出奇呀？話曬都叫擺得入口吖，呢部直頭將火車玩具、蠟燭同零食、飲品擺埋一齊呀！喂喂，入面收銀個哥哥你聽唔聽到呀，你畀少少職業道德，唔好將自己屋企啲唔要嘅雜物都拎埋出嚟賣先得㗎！
ツッコミが追いつかなくなってる pic.twitter.com/4iDWUK9Opc
— 加藤隆司/水金汞#鳥オフ募集締切4/26 (@quecksilber_) April 19, 2017
封面圖片、資料來源連結：quecksilber_／twitter
《自動販賣機大集合》
