冇耐之前有家長寫咗封信畀老師，話要自行調整功課量同希望學校唔好忽視小朋友休息、遊戲嘅權利，引起全港唔少家長關注，同埋go though高呼反對TSA。

TSA原本係想測試學生基本能力嘅，但啲題目就愈嚟愈深，連田二少都唔識答，小學生就更加唔使講啦，唔想肥佬，咪唯有日操夜操咩「TSA加油站」、「TSA星級題型」囉。最近救恩學校小學部同旺角神召第一小學暨幼稚園都決定由今個學年開始，唔參加TSA喇，真係令人葡萄！

網上都有班家長，發起咗個叫「我不做奴隸」嘅活動，呼籲家長寫低小朋友幾點放學、用幾多時間做功課同玩，或者「我不願小朋友成為功課奴隸」再post上網，等多啲人關注香港小朋友嘅學習壓力。毛毛都想寫畀腦細睇呀...... 起床時間6:45am，放工返到屋企11pm，自由玩遊戲時間呢......玩鬼玩馬咩早啲瞓好過啦７頭。

出咗名錫仔仔嘅林子博（即係大台《東坡家事》個細路個真‧daddy呀）都post相撐呢個活動呀～希望小朋友真係可以唔使做功課奴隸，未返工就日日攰到隻狗咁啦……

封面圖片來源：Sharon Ho、林子博

資料來源：不願小朋友成為功課奴隸、明報、林子博

延伸閱讀：【家長唔一定怪獸】唔想小朋友做功課奴隸、【好很難】小六TSA 田二少答錯一半