好多人打機都會忍唔住課金，但毛毛定力好，完全冇呢個煩惱⋯⋯哪有錢！

外國有個小朋友，人仔細細就明白成功須父幹嘅道理，用老竇個Apple ID，課咗成4000英磅，即大拿拿4萬幾港紙呀！

乜Game咁巴閉要用咁多錢？睇過！原來係呢隻侏儸紀公園嘅IPad game。阿仔啲錢就係用咗嚟幫啲恐龍升下level，買下新角色咁。

老竇一睇到張帳單，嚇到心都離一離，一Check先知係阿仔課金。佢即刻打去Apple問可唔可以退錢，求情話咁大筆數佢真係畀唔起呀！Apple都知小朋友只係無心之失，應承全數退返畀呢位爸爸。

老竇之後就同阿仔解釋返4萬蚊係好多好多，阿仔就即刻認錯，仲好生性咁話：「我寧願del晒所有恐龍呀！」

哎呀，其實阿仔你唔使認錯㗎，你咪話有黑客hack咗部IPad，完全唔關你事囉。呢個理由，實信啦！

資料來源：Daily Mail

封面圖來源：Daily Mail