細個?陣睇電視，一去廣告毛毛實走開去下薯薯㗎，唔係好㗎嘛，嗰 5分鐘直頭好似5個字咁難頂呀，不過如果啲廣告拍到好似電影咁，又唔同講法喎，毛毛實坐定定狂 loop啫！

好多屋企生咗bb之後，都會話驚照顧唔嚟呀，驚bb敏感呀，而送走本身養緊嘅寵物，就算唔棄養，都好可能會掛住陪個bb，忽略咗寵物嘅感受～日本呢個廣告入面個家庭都一樣呀！呢兩公婆生咗個好打耳嘅bb女，就掛住同心肝寶貝玩，隻金毛狗狗咪唯有企埋一二邊望住佢哋囉……

個bb女咁cute ，鍾意小朋友嘅狗狗梗係玩同佢握握手做個好朋友啦！點知bb一見到狗狗就即刻喊晒……毛毛見到阿Bob或者雪雪（aka.林雪）呢啲大隻仔個心都會驚一驚嘅，bb第一次見到大狗狗會驚都唔出奇，唔可以怪佢嘅，不過狗狗畀人請食檸檬，梗係sad到爆啦……

有一日，Daddy 媽咪又陪bb玩獅子公仔喇，冇朋友嘅狗狗又再企埋一邊得個睇字。咁啱就畀Daddy見到狗狗個灰狗樣，於是叮一聲畀佢諗到，不如上網買啲嘢幫下狗狗呀！

原來Daddy買咗個毛毛圈畀狗狗戴住扮獅子仔，希望bb會接受佢呀！自信滿滿嘅金毛獅子狗走埋bb度撩佢玩，bb終於都唔再驚喇，仲伸隻手仔出嚟摸佢個鼻鼻?！

從此，呢家人就幸福快樂咁生活落去喇！呢個故事教訓我哋，一家人最緊要係齊齊整整！冇錯呀，毛毛係話一家人呀，狗狗唔係寵物，而係我哋屋企人，點可以偏心㗎呢？

封面圖片、資料來源：Amazon Prime Commercial/Youtube