成日聽人講結婚要使好多錢，又要影相又要擺酒又要租衫，冇幾廿萬都落唔到樓呀！不過其實大有大搞，細有細搞嘅啫，最近新加坡就有對新人平平地用咗350蚊坡紙（即係2000幾蚊港紙咋）包起個攝影師影相加埋執相喇！一齊睇下啲精彩s 作品囉！

首先睇下新郎哥接新娘子嘅相先啦，嘩，做咩執到黑白色㗎？其實攝影師都係想將大家嘅目光集中喺門上面個Welcome牌仔上面，表達新娘對婚姻嘅期待啫，呢種以實寫虛嘅手法，高手高手。

好喇接到新娘喇，趁未開席靚返幾張靚相先啦，作品上面嘅藍調充滿科幻未來感，甚至有啲阿凡達嘅味道，如果用嚟做電影題材，相信會幾啱鼠王芬口味。

三個人，兩隻空洞嘅眼睛，一張相，奏出毒L嘅哀歌：不甘心，人人不開心，尤其這新婚，失去我身份……

用普通角度影嘅相，大家就睇得多，由花仔花女角度去仰望婚姻嘅神聖，又試過未呢？

難得咁高興，梗係要同親朋戚友飲多幾杯啦，新娘頻撲咗成日，個妝都應該甩得七七八八，用酒杯遮一遮佢個樣，都係好合理嘅。

曾經有人話過，婚姻，係愛情嘅墳墓，毛毛都唔相信，直至睇到呢張大作，就終於明喇……都好呀，如果唔結婚，直頭死無葬身之地?呀……

呢輯咁出色嘅結婚相喺網上瘋傳，攝影師就話總共有900幾張相，對新人就拎住呢廿張鬧爆佢，覺得好唔公平。毛毛就話喇，根本都唔係數量嘅問題，單係將結婚相執到黑白色呢個咁新穎嘅藝術觸覺，已經好值得同大家些牙啦！

封面圖片、資料來源： MashableAsia

延伸閱讀：【19萬円影到咁？】婚攝公司足本真相還原