以前通常至多人瘋傳嘅都係啲慘絕人寰或者黐線到離晒罩嘅故仔，不過呢排facebook好似唔興喊同公審，自從大笑面具媽媽破咗facebook 最多人睇嘅live嘅紀錄，而家興笑呀～ 

有台灣網民放咗自己車cam嘅片上網，不過就唔係炒車片，而係有人對住佢個車chok笑樣，唔係笑人kai或者傻仔喎，而係勁like佢好有喜感，個笑容好有感染力呀～

呢個哥哥仔喺燈位停低之後，冇擺出唔耐煩嘅表情，反而對住前面個鏡頭笑同埋蹙眉，睇完佢個樣自己都開心埋。

香港唔止全球工時最高，仲啱啱得到全球微笑指數最低嘅殊榮，又做得耐又唔開心，做香港人真係好感恩呀～ 邊度似得台灣人咁成日笑咁唔得嚴肅先得㗎，毛毛去台灣旅行嗰時見到一街人都笑笑口，朝頭早仲有路人同你笑住打照呼，直程覺得成個世界都好唔真實呀。

去完台灣返香港見到周街好嬲咁樣樣，真係一出街都成個人謝晒，笑吓啦香港人，笑一笑，世界更美妙吖嘛，苦笑都好吖，嘿嘿嘿......

來源：何浩維