是咁的，話說最近有位台灣妹豬喺商場食嘢嘅時候，見到一位婆婆係咁望住佢啲嘢食……咦，唔通婆婆覺得肚餓但又冇錢買嘢食？咁要幫幫婆婆先得喎。

於是呢位妹豬就買咗少少嘢食畀婆婆，仲陪婆婆傾咗陣偈。原來呢位婆婆因為全部家人已經離世嘅關係，所以冇人照顧佢，佢就每日坐喺度打躉，佢仲話，其實每日喺度睇住咁多家庭一齊食飯，都會覺得好心悒……

其實，唔止台灣，香港都有好多獨居老人需要大家關心，或者我哋能力有限，做唔到啲咩，但有時候佢哋需要嘅唔係咩大恩大惠，如果有人陪佢哋傾下偈、關心下佢哋，佢哋都會好開心㗎喇。老土講句，香港需要更多愛呀哈利！

圖片及資料來源：李雨庭