講到機械人，唔少人第一時間會諗起日本呢個高達發源地，雖然日本仲未整到堅．高達或者堅．叮噹，但係佢哋嘅機械人工業真係發展得幾好㗎！就好似機械人Pepper仔咁，唔止喺日本服務客人，仲去埋台灣working holiday?～青靚白淨嘅Pepper仔真係好幫得手呀！

不過唔知係咪臨近聖誕，佢想畀個實派大家呢，最近Pepper仔個樣好似有少少唔同喎……er，你哋都係自己睇啦。

咦，呢個咪子華神講嘅「整容分分鐘變毀容」最佳例子？Pepper仔，你本來個樣咪好地地囉……而家見到你個樣（特別係嗰堂八字眉），搞到大批日本網民都一致comment話想大巴大巴咁星你喇！

其實Pepper仔進化成呢個搏打look係有原因㗎！因為佢嚟緊嘅新崗位係喺近上野動物園嘅上野站度為遊客解答疑難，而熊貓又係間動物園嘅生招牌喎，所以搞到Pepper仔變咗熊貓樣囉。至於堂八字眉……以毛毛9估，設計師可能知道八呢個字好意頭，所以先整堂八字眉畀佢㗎啫，55。

btw，Pepper仔你都唔好咁難過喇，眉呢家嘢，紋得唔好同剪錯髮型一樣，都係7一排就冇事㗎喇！反正你都係做到出年3月尾啫～如果大家見到佢，就麻煩抑制一下想樁佢嘅衝動，拍下佢膊頭講句We all know that feel bro當安慰下佢就算啦好嗎？話晒「人誰冇7過」呢～

封面圖片及資料來源：ITmedia