病呢家嘢有時同運氣一樣話嚟就嚟，啲病徵又唔清唔楚咁，諗諗下又好似某某大病啲徴兆喎，真係嚇死寶寶呀。但係有啲人又要驚，又唔肯去睇醫生，淨係上網睇埋啲乜乜知識網嚟自己嚇自己，咁搞法，出事㗎嘛！

外國有位仁兄一起身就見到自己隻腳變黑咗，真係嚇到心都離一離呀。呢個時候佢就為大家做咗個錯誤示範，就係唔睇醫生，走去上網Google下發生咩事喇。一望真係晴天霹靂呀，竟然畀佢搵到隻腳變黑係雷諾氏現象嘅徵狀之一。介紹返，雷諾氏現象係因為寒冷刺激或者情緒波動等等因素令到血管受縮，如果唔妥善處理，患處可能會硬化甚至潰爛㗎。OK，簡單嚟講，即係以為有病，自己嚇9自己囉。

Molamola，隻腳冇喇⋯⋯正當佢打算同老婆講呢個不幸嘅消息，準備交低啲私己呀保險呀嗰啲嘢畀老婆聽嗰陣，老婆竟然望住佢隻腳爆笑呀！衰婆，你老公咁大鑊仲笑？唔通老婆有第個？一問先知原來唔係老公有病，係老婆早一晚拎咗佢隻襪當手套搽黑鬼油，仲要好好手尾咁反返轉隻襪放入櫃桶呀！

唉⋯⋯做人老公甚艱難，咁畀老婆整蠱法咪唯有上網搵下巴打訴苦囉，點知原來天下巴打一樣「黑」，大家啲老婆都咁鍾意用老公隻襪嚟搽黑鬼油，個個都即刻Po相出嚟控訴呀，有個ching就好彩啲，只係畀老婆搞到好似瘀咗一撻咁，另一個就慘啦，兩隻腳中晒招呀！

算啦，老婆永遠是對的呀嘛～用對襪嚟搽油咪算好囉，如果係用你條⋯⋯面巾嚟搽，你就明符其實黑都面埋喇。再咁多齮齕，下次老婆拎你把梳搽脫毛膏你就知味道！

封面圖片及資料來源：每日郵報