夠喇，唔好再中傷Thomas啦，其實Thomas係好可愛㗎，55，一定係咁⋯⋯嗚呀，唔得呀，無論幾努力，毛毛都係冇辦法覺得佢可愛呀！就好似無論你對女神點好，女神係唔接受你就點都唔接受㗎啦！有人問做咩成日都寫到Thomas咁恐怖，其實毛毛都唔想㗎，邊個叫佢出現親個畫面都咁衝擊啫！

好似呢個日本網友咁，見日光日白咁好太陽就費事開燈啦，等啲太陽光照入嚟，咪既慳電又環保囉～點知佢去經過個廳嗰陣，突然感覺到廳入面有一對陰森嘅眼睛望住佢⋯⋯

X！嚇死人咩，嚇到個心都離一離呀，邊L個放架Thomas火車喺度呀！仲要咁啱喺陰暗嘅廳度有一道光由上而下打斜咁射喺佢塊面度，笑到人寒都心埋，想點啫你！

「做咩啫，我唔會傷害你㗎喎，我哋一齊玩吖⋯⋯」

唔得⋯⋯呢句說話配落Thomas你度，真係一啲說服力都冇，望住你塊面嘅陰影，再加埋平日對住你累積嗰啲心理陰影，個陰影總面積仲大過個廳呀！Come on Thomas，我哋幫你化妝又試過，改裝又試過，有啲嘢，唔得就係唔得，係唔可以勉強㗎。

唔係你嘅錯，Thomas你已經做得好好㗎喇，但你明唔明呀，係Timing嘅問題呀，你成日喺啲Wrong Timing出現。就算係比卡超，喺錯誤嘅時間出現都好令人心寒啦係咪？雖然，點睇都係唔夠你恐怖⋯⋯

封面圖片及資料來源：pocky_pocky／twitter、masamasalee／twitter