日本「滿員電車」嘅威力有幾強？相信大家就算冇親身經歷過，都一定會喺網上見識過㗎嘞。而最近，有一位不幸嘅日本網民都搭上咗一架載滿人嘅列車，架「滿員電車」唔止搞到佢畀人夾扁呀，仲連佢手上面揸嗰個麵包都畀人夾到扁埋?⋯⋯

大家睇下，由側面睇個包真係薄到「零感特薄」咁㗎⋯⋯唉，其實一條小窮L局住迫地鐵已經夠慘㗎啦，而家仲要連佢要嚟頂肚嘅麵包都畀人夾扁埋，真係慘絕人寰呀！

btw，凡事應該向好嗰方面睇⋯⋯其實樂觀啲諗，個包都幾似真空包裝吖係咪？平時啲真空包裝嘅加工肉類同蔬果都係差唔多樣咋嘛，只不過麵包裡面嘅空氣就比較多，所以先會咁扁㗎啫～而家個包畀人強行變成真空包裝咁咪可以延長保鮮期囉（應該係，除非唔係）！仲有呀，啲人成日都話食麵包就好似食緊化學空氣咁，而家呢個包嘅口感咪夠晒實在囉，55！

再講吖，其實呢位日本網民個包應該算好足料㗎喇，如果係呢啲空心包嘅話，經過完「滿員電車」嘅洗禮之後就唔止薄到好似而家咁，而係薄到可以擺落銀包㗎喇⋯⋯

君たちに満員電車の辛さを教えてあげます。 pic.twitter.com/BtT4A3PfLA

— サバ缶@低浮上許せ (@hikikomorigati) 2017年5月13日

資料來源：hikikomorigati／twitter