係呀，又係厚多士呀。咁見到佢個樣咁邪惡，毛毛豬真係忍唔到口又忍唔到手吖嘛～

呢個香蔥碎牛炒蛋厚多士（$28）一送到嚟嘅時候已經聞到好香嘅蔥油味，麵包係烘底，再索埋碎牛炒蛋啲蛋汁，夠晒滿足～不過啲牛就真係碎咗少少，食唔出有咩牛味囉！

毛毛豬仲食埋佢個奶油脆豬（$15）～佢會即叫即焗，熱辣辣咁拎出嚟，啲牛油同煉奶撈埋一齊，成件事真係勁邪惡！不過其他地方都會食到，呢個價錢值唔值，就你諗你喇～或者可以叫啲兵仔嚟畀嘅～

嚟到冰室，就緊係要飲吓佢哋啲特飲啦！有冇諗過鴛鴦都可以變成紅豆冰（$28）？

平時飲凍飲，啲餐廳都好鍾意啲冰有咁大粒得咁大粒，但呢度係就係有一大粒冰喺面，不過，你鍾意凍啲咪可以「畢」多啲，唔想咁凍咪「畢」少啲囉～啱晒腌尖嘅港女（唔係我）啦！

餐廳資料：

海安咖啡

地址：上環干諾道西17號地下

營業時間：星期一至四及六: 07:30-16:30、星期五: 07:30-15:00、星期日及公眾假期休息

電話：2540 6340