歡迎歡迎！熱烈歡迎！自從熊本發生地震之後，熊本熊部長因為驚會影響救災工作，所以一直都停緊工。但今日部長終於都復工喇！佢仲去咗其中一個重災區嘅避難所，同大家打打氣呀！

成班小朋友見到部長都好開心，仲衝去攬住佢，又督佢個鼻呀咁。部長一啲都冇反抗㗎，你睇下佢眼神幾enjoy~

之後佢又去咗探老人家，成班公公婆婆見到部長都開心到見牙唔見眼，有位婆婆仲話呀，雖然而家嘅生活有啲艱苦，但見到部長一刻終於都可以輕鬆下，可以開開心心咁笑喇！

部長你要加油，努力守護住熊本嘅笑容呀！奸爸爹！

圖片來源、資料來源：朝日新聞