「你住元朗呀？有冇牛㗎？」

喺元朗土生土長，讀咗19幾年書嘅毛毛話你知，而家嘅元朗只有絡繹不絕嘅水貨客，唔好話人啦，連牛都冇空間行。

日新月異，有好多熟悉嘅地方已漸漸消失，千色廣場外嘅西洋大鐘已經變成務實嘅電子鐘，毛毛都想學金城武咁講，究竟呢個世界上仲有咩係未過期？

有！原來真係有！

大個咗先知，原來一個區嘅都市傳說係咁歷久不衰。當毛毛連讀書學過啲乜都唔記得，但學生時期討論過嘅區內故事仲歷歷在目。而家就由毛毛趕去現場，解開大家心裡嘅迷思。

傳聞一・「餅叔」之死

「你坐喺電腦前面，嘗試喺搜尋引擎器裡面輸入『元朗餅...』，自動彈出嘅第三個聯想語句，亦即是全球被搜尋次數第三多嘅語句，係『元朗餅叔 』」。「餅叔」係元朗出沒嘅一位拾荒者，因為用長長嘅頭髮盤成個蛇餅而命名，多數喺大馬路出沒。相信元朗人對佢非常熟悉，但佢係幾時出現喺?區呢？

「我哋82年就開舖，我記得『餅叔』好似喺十幾年前就突然之間出現喺我哋舖頭附近。」－校服制服舖黃小姐

「餅叔」露宿嘅地方有兩個，而教育路嘅校服制服舖前地就係其中一個，甚至有網民問過一個極有哲學性嘅問題，究竟係有間舖頭先定「餅叔」先，咁而家就解答到大家嘅疑問。

好多人得悉佢不幸辭世嘅消息都感到錯愕，其死因亦喺社區內廣傳，但大家都各執一詞，有人話佢係觸電而死，又有人話佢係畀掉落嘅燈箱壓死，甚至有人話佢已經返生。所以話，「餅叔」係元朗人嘅一個謎。

除咗老闆之外，一講起「餅叔」，其他街坊都表示有印象。

「我以前返學成日都撞到佢，一開頭係有啲驚嘅，但見開咗就慣，反而佢唔出現，會有少少擔心佢去咗邊！」

「初初聽到佢死咗，個心都有少少唔舒服，每次行經佢曾出沒嘅地方，都會?兩眼。」

雖然好多人都相信佢已赴黃泉，但佢帶畀我哋嘅回憶會永垂不朽。

傳聞二・元朗公園前身係亂葬崗？

相傳元朗公園百鳥塔範圍係日軍打仗期間嘅亂葬崗，而八角塔就係鎮鬼嘅。有街坊表示，試過夜晚晚入去，都覺得陰風陣陣，甚至試過瀨嘢添...夠喇！毛毛唔想聽落去！

不過究竟係咪真㗎？

「係真㗎！以前日本仔會係新區嗰邊將戰俘槍斃，之前再運屍到元朗公園?邊。所以百鳥塔係用嚟鎮壓㗎！仲有呀，聽講新區之前都好猛㗎，係多得個塔趨吉避凶，先冇咁多靈異事件！」

「不過恐唔恐怖都係睇你啫！我哋成班日日晨運圍住墳場跑都冇事啦，hehe！」

一班晨運嘅叔叔嬸嬸一邊耍拳，一邊好興奮咁講。

其實呢個都市傳說，到而家都係口傳歷史，毛毛問過google大神，都搵唔到官方嘅記載。不過入夜去真係要小心啲，因為公園位置偏僻，間唔中會有情侶享受無人之境，野生捕獲大岩蛇就唔係幾好喇！

傳聞三・執笠十年還未完

「同益間鞋舖唔做喇！快啲去睇下有冇平嘅鞋買嚟返學。」

細個時，老母聽到鞋舖執笠，有平嘢執梗係9衝掃返幾對先啦。但間鞋舖話執唔執，成個舖頭貼滿「最後今天」、「清貨大減價」，去到毛毛業都畢埋，佢仍然屹立不倒，可以話係經濟大倒退中嘅奇葩。

「雖然有好多年冇入過去，但每次經過都會心諗，佢究竟囤積咗幾多貨？我粗略估計，大概最後一天咗八年到啦」－附近美容院返工嘅何小姐

「我喺到做咗大概十年，不過我諗佢清貨嘅歷史比我仲長」－鞋舖對面兌換店嘅靚姐姐

毛毛試過將?個傳奇同其他區嘅FD子講，發覺原來每一區都有屬於佢嘅執笠小強，無論係錶舖定碟舖，都好頑強咁經營緊。

可能你話你都唔係住元朗，唔會有共嗚，但其實個個地區嘅都市傳說都大同小異，都係屬於大家嘅集體回憶，每一次同舊同學、舊朋友講起，回憶就會一秒湧現，原來你都係我同鄉呀！

(P.S. 元朗人傑地靈，著名NBA球星Fisherman Lok亦都生於此，路過不妨去一去鐘聲球場，感受孕育出一代球星嘅地方。)